ޕާޓާ ސަމިޓުގައި ވިޒިޓް މޯލްޑިވްސް: ފަތުރުވެރިކަމުގެ ސިޔާސަތު ބައްޓަންކުރުމުގައި ރާއްޖޭގެ ދައުރު
ވިޒިޓް މޯލްޑިވްސްގެ ސީއީއޯ އަދި މެނޭޖިންގ ޑިރެކްޓަރ އިބްރާހިމް ޝިއުރީ، ކޯރިއާގެ ގްޔޮންގްޖޫގައި ބޭއްވި ޕާޓާ އަހަރީ ސަމިޓް 2026 ގައި ބައިވެރިވެވަޑައިގެންފިއެވެ. މެދުއިރުމަތީގައި ހިނގަމުންދާ ހަމަނުޖެހުންތަކުގެ ސަބަބުން ފަތުރުވެރިންގެ ބޭނުންތަކަށް އަންނަ ބަދަލުތަކަށް ސަމާލުކަން ދިނުމަކީ މުހިންމު ކަމެއްކަމަށް ޝިއުރީ ވިދާޅުވިއެވެ. ދުނިޔޭގެ ސުލްހައަކީ ފަތުރުވެރިކަމުގެ ސިނާއަތް ދެމެހެއްޓުމަށްޓަކައި ކޮންމެހެން ބޭނުންތެރި ކަމެއްކަމަށް އޭނާ ފާހަގަކުރެއްވިއެވެ. "ނެވިގޭޓިންގ ޓުވާޑްސް އޭ ރެސިލިއަންޓް ފިއުޗަރ" ޝިއާރުގެ ދަށުން ބޭއްވި މި ސަމިޓުގައި 35 ގައުމަކުން 550 އަށްވުރެ ގިނަ މަންދޫބުން ބައިވެރިވިއެވެ. މީގެ ތެރޭގައި ސަރުކާރުގެ އިދާރާތަކާއި، އެއާލައިންތަކާއި، ފަތުރުވެރިކަމުގެ ދާއިރާގެ އިސް ފަރާތްތައް ހިމެނެއެވެ. މި ބައްދަލުވުމުގެ ސަބަބުން ރާއްޖޭގެ މާކެޓިންގ މަސައްކަތްތަކަށާއި ޚާރިޖީ ގުޅުންތަކަށް އިތުރު ކުރިއެރުން ލިބޭނެއެވެ.
