ޔޫކޭ ޓެރިފް ކަނޑާލުން: މަސްވެރިކަމަށް ތާރީޚީ ކާމިޔާބެއް
މުހިންމު ކަންތައްތައް
- 1.މޭ މަހުގެ 20 ވަނަ ދުވަހުން ފެށިގެން އިނގިރޭސިވިލާތުން ދިވެހިރާއްޖޭގެ ކަނޑުމަހުގެ އުފެއްދުންތަކުން ނަގަމުންދިޔަ ޓެރިފްތައް ކަނޑާލާފައިވެއެވެ.
- 2.ރައީސް މުޢިއްޒު ވަނީ ލަންޑަނުގައި އިނގިރޭސި ރަސްގެފާނާއި ސަރުކާރުގެ އިސް ވެރިންނާއެކު ބޭއްވެވި ބައްދަލުވުންތަކުގައި މި ޓެރިފްތައް ކަނޑާލުމާ ބެހޭގޮތުން ސީދާ މަޝްވަރާ ކުރައްވާފައެވެ.
- 3.ސަރުކާރުގެ މަސް ކުންފުނިތަކަށް މަސްކިރާތާ 48 ގަޑިއިރުގެ ތެރޭގައި މަސްވެރިންނަށް ފައިސާ ލިބޭނެ އާ ނިޒާމެއް ވަނީ ތައާރަފުކޮށްފައެވެ.
- 4.މަސްވެރި އުޅަނދުތަކުގައި އާރްއެސްޑަބްލިއު (RSW) ސިސްޓަމް ހަރުކުރުމަށް މާލީ އެހީތެރިކަމާއި އަގުހެޔޮ ތެޔޮ ފޯރުކޮށްދިނުމުގެ އިންތިޒާމު ސަރުކާރުން ދަނީ ހަމަޖައްސަމުންނެވެ.
- 5.ބައިނަލްއަގުވާމީ ބާޒާރުގައި ދިވެހި މަސްވެރިކަމުގެ އުފެއްދުންތައް އިޝްތިހާރުކޮށް ކުރިއެރުވުމަށް ޚާއްސަ ސަރުކާރުގެ ކުންފުންޏެއް ވަނީ އުފައްދާފައެވެ.
މިދިޔަ މޭ މަހުގެ 20 ވަނަ ދުވަހުން ފެށިގެން، ދިވެހިރާއްޖޭގެ ކަނޑުމަހުގެ އުފެއްދުންތަކުން ޔުނައިޓެޑް ކިންގްޑަމް (ޔޫކޭ) އިން ނަގަމުންދިޔަ ޓެރިފް ކަނޑާލުމަށް ނިންމި ނިންމުމަކީ، ރާއްޖޭގެ މަސްވެރިކަމުގެ ސިނާއަތަށް ލިބުނު ތާރީޚީ ކުރިއެރުމެއް ކަމަށާއި، އެއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކުރެއްވި ސިޔާސީ އަދި ޚާރިޖީ މަސައްކަތްޕުޅުތަކުގެ ސީދާ ނަތީޖާކަމަށް ބުނެ ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން އެކަމަށް މަރުޙަބާ ކިޔައިފިއެވެ.
ލަންޑަނަށް ކުރެއްވި ރަސްމީ ދަތުރުފުޅެއްގައި ރައީސް މުޢިއްޒު ވަނީ އިނގިރޭސި ރަސްގެފާނާއި އެ ގައުމުގެ ސަރުކާރުގެ އިސް ވެރިންނާ ބައްދަލުކުރައްވައި މުހިންމު މަޝްވަރާތަކެއް ކުރައްވާފައެވެ. މި ބައްދަލުވުންތަކުގައި ރާއްޖޭގެ މަހުގެ އުފެއްދުންތަކަށް ޔޫކޭގެ ބާޒާރުން ފުރުސަތު ހުޅުވައިދިނުމަށްޓަކައި ޓެރިފް ކަނޑާލުމަކީ ރައީސް އެންމެ އިސްކަމެއް ދެއްވައިގެން ހުށަހެޅުއްވި ކަމެކެވެ. މި ލުޔާއެކު ރާއްޖެއިން ބޭރުކުރާ މަހުގެ މިންވަރު އިތުރުވެ، އުފެއްދުންތެރިކަން ފުޅާވެ، ދައުލަތަށް ލިބޭ އާމްދަނީ އިތުރުވެގެންދާނެއެވެ. މިއީ މަސްވެރިންނަށާއި، އެމީހުންގެ އާއިލާތަކަށް އަދި ވިޔަފާރިތަކަށް ލިބުނު ބޮޑު ކުރިއެރުމެކެވެ.
ޕީއެންސީން ފާހަގަކުރި ގޮތުގައި، މަސްވެރިކަމުގެ ސިނާއަތް އަލުން ކޮޅަށް ޖެހުމަކީ މި ސަރުކާރުގެ ފުރަތަމަ ދުވަހުން ފެށިގެން އެންމެ އިސްކަންދޭ އެއް ސިޔާސަތެވެ. ޚާރިޖީ ދާއިރާއިން ހޯދި މި ކާމިޔާބީގެ އިތުރުން، އެތެރޭގެ އިސްލާހީ ގިނަ ފިޔަވަޅުތަކެއްވެސް ސަރުކާރުން ދަނީ އަޅަމުންނެވެ. އެގޮތުން، ސަރުކާރުގެ މަސް ކުންފުނިތަކަށް މަސް ކިރާތާ 48 ގަޑިއިރުގެ ތެރޭގައި މަސްވެރިންނަށް ފައިސާ ދިނުން ކަށަވަރުކޮށްދޭ ނިޒާމެއް ވަނީ ގާއިމުކޮށްފައެވެ. މި ބަދަލަކީ ސަރުކާރުގެ ޚަަރަދުތައް ކުޑަކޮށް، ދައުލަތުގެ ކުންފުނިތަކަކީ ޒިންމާދާރު، ހަރުދަނާ އަދި ގައުމީ ދަރަނި އިތުރުވުމުގެ ބަދަލުގައި ފައިދާ ހޯދައިދޭ ތަންތަނަށް ހެދުމަށް ސަރުކާރުން ގެންގުޅޭ ސިޔާސަތާ އެއްގޮތްވާ ގޮތުގެ މަތިން ގެނެވުނު މުހިންމު އިސްލާހެކެވެ.
މީގެ އިތުރުން، މަސްވެރި އުޅަނދުފަހަރަށް އަގުހެޔޮކޮށް ތެޔޮ ފޯރުކޮށްދިނުމާއި، މަސް ދޯނިފަހަރުގައި އާރް.އެސް.ޑަބްލިޔު ސިސްޓަމް ހަރުކުރުމަށް މާލީ އެހީތެރިކަން ފޯރުކޮށްދިނުމުގެ މަސައްކަތް ސަރުކާރުން ދަނީ ކުރަމުންނެވެ. އަދި ބައިނަލްއަގުވާމީ ބާޒާރުގައި ދިވެހި މަސްވެރިކަން އިޝްތިހާރުކޮށް ކުރިއެރުވުމަށް ޚާއްސަ ސަރުކާރުގެ ކުންފުންޏެއް ވަނީ އުފައްދާފައެވެ. މި ހުރިހާ މަސައްކަތަކާއެކު، ސަރުކާރުން ދަނީ މަސްވެރިކަމުގެ ސިނާއަތުގެ ދެމެހެއްޓެނިވި ކުރިއެރުމަށް ވަރުގަދަ ބިންގަލެއް އަޅަމުންނެވެ.
ޕީއެންސީން އިތުރަށް ބުނެފައިވަނީ، މަސްވެރިން ބާނާ މަހަށް ހަމަ އަގު ހޯދައިދިނުމާއި، ދުނިޔޭގެ އާ ބާޒާރުތަކުން ދިވެހި މަހުގެ އުފެއްދުންތަކަށް ޖާގަ ހޯދައިދިނުމަށް ރައީސް ކުރައްވަމުން ގެންދަވާ މަސައްކަތްޕުޅުތަކަކީ މަސްވެރިކަމުގެ ސިނާއަތް އިނދަޖެހުމުން ސަލާމަތްކުރުމަށް އެޅުނު މުހިންމު ފިޔަވަޅުތަކެއް ކަމަށެވެ. ބައިނަލްއަގުވާމީ ވިޔަފާރީގެ ލުއިތަކާއި، އެތެރޭގެ ސަބްސިޑީތަކާއި އޮނިގަނޑަށް ގެނެވޭ ޒަމާނީ ބަދަލުތައް އެއްކޮށްލުމުން، ސަރުކާރުން މިދަނީ މަސްވެރި އާއިލާތަކުގެ ދިރިއުޅުން އާރާސްތުކުރުމަށް ރައްޔިތުންނަށް ވެފައިވާ ވަޢުދުތައް ފުރިހަމައަށް އަދާކުރަމުންނެވެ.