ބައިނަލްއަގުވާމީ މަސްވެރިކަމުގައި ރާއްޖެ އިސްކޮށް ނުކުމެއްޖެ.

ބައިނަލްއަގުވާމީ މަސްވެރިކަމުގެ ސިޔާސަތުތައް ބައްޓަންކުރުމުގައި ދިވެހިރާއްޖެއަކީ ނުފޫޒުގަދަ އަދި ވަރުގަދަ އަޑެއް އިއްވާ ގައުމެއްގެ ގޮތުގައި ވަނީ ސާބިތުކޮށްދީފައެވެ. ޕީއެސްއެމްގެ "ރާއްޖެ މިއަދު" ޕްރޮގްރާމުގައި ވާހަކަދައްކަވަމުން މިނިސްޓަރ އޮފް ފިޝަރީޒް، އެގްރިކަލްޗަރ އެންޑް އޯޝަން ރިސޯސަސް އަހުމަދު ޝިޔާމް ވިދާޅުވީ، ދުނިޔޭގެ މަސްވެރިކަމުގެ ސިޔާސަތުތައް ކަނޑައެޅުމުގައި ރާއްޖެއިން މުހިންމު ދައުރެއް އަދާކުރަމުންދާ ކަމަށާއި، ގައުމުގެ އިގްތިސާދީ މަސްލަހަތުތަކާ ގުޅުންހުރި ބައިނަލްއަގުވާމީ މައިދާންތަކުގައި ރާއްޖެއިން ހަރަކާތްތެރިވަމުންދާ ކަމަށެވެ.

މިގޮތުން، ދާދިފަހުން ރާއްޖޭގައި ބޭއްވުނު އިންޑިއަން އޯޝަން ޓޫނާ ކޮމިޝަން (އައިއޯޓީސީ) ގެ 30 ވަނަ ބައްދަލުވުމުގެ ރިޔާސަތު ބަލަހައްޓައި، އެ ބައްދަލުވުން ކާމިޔާބުކަމާއެކު ރާއްޖެއިން ވަނީ ބާއްވާފައެވެ. އެކި ގައުމުތަކުން 250 އަށްވުރެ ގިނަ މަންދޫބުން ބައިވެރިވި މި ބައްދަލުވުމުގައި، ރާއްޖެއިން ހުށަހެޅި ހަތް ހުށަހެޅުމުގެ ތެރެއިން ތިން ހުށަހެޅުމެއް ވަނީ ކާމިޔާބުކަމާއެކު ފާސްކޮށްފައެވެ. މީގެއިތުރުން، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސީދާ އިރުޝާދާއި އެހީތެރިކަމާއެކު، ރާއްޖެއަށް ކަނޑައެޅިފައިވާ ރީނދޫއުރަހަ ކަންނެލީގެ ކޯޓާ ވަނީ ކާމިޔާބުކަމާއެކު ދިފާއުކޮށްފައެވެ. މިއީ ރާއްޖޭގެ ކަންނެލި މަސްވެރިކަމުގެ ދެމެހެއްޓެނިވި ކުރިއެރުމަށް ލިބުނު މުހިންމު ކާމިޔާބީއެކެވެ.

ބައިނަލްއަގުވާމީ މައިދާނުގައި ހޯދަމުންދާ މި ކާމިޔާބީތަކާއެކު، ރާއްޖޭގެ ދާޚިލީ މަސްވެރިކަމުގެ އިންފްރާސްޓްރަކްޗަރ ވަރުގަދަކުރުމުގެ މަސައްކަތްވެސް ސަރުކާރުން ދަނީ ކުރަމުންނެވެ. މިގޮތުން އައްޑޫ ސިޓީގެ މަސްވެރިންނަށް ހުރި ދަތިތަކަށް ހައްލު ހޯދައިދިނުމަށް ގިނަ ފިޔަވަޅުތަކެއް އެޅުމަށް ވަނީ ނިންމާފައެވެ. އޭގެ ތެރޭގައި، އައްޑޫ ސިޓީގެ ގުޅިފައިވާ ރަށްތަކުގައި މިފްކޯގެ ޚާއްސަ ފިހާރައެއް ހުޅުވައި، ދަޅުމަހާއި، ވަޅޯމަސް އަދި ރިހާކުރު ފަދަ އުފެއްދުންތައް ފަސޭހައިން ލިބޭނެ އިންތިޒާމު ހަމަޖެއްސުން ހިމެނެއެވެ.

މީގެއިތުރުން، އައްޑޫ ގަމުން މަސްވެރިންނަށް ތެޔޮ ފޯރުކޮށްދޭ ގަޑިތައް ރޭގަނޑު 10:00 އާ ހަމައަށް ވަނީ އިތުރުކޮށްފައެވެ. މީގެކުރިން މި ޚިދުމަތް މެދުކަނޑާލަނީ ހަވީރު 4:00 ގައެވެ. އަދި ހިތަދޫ އައިސް ޕްލާންޓް ކައިރީގައި އެސްޓީއޯގެ ތެޔޮ ޝެޑެއް ގާއިމުކުރުމުގެ މަސައްކަތްވެސް ދަނީ ކުރެވެމުންނެވެ. މިފްކޯ އަދި އެސްޓީއޯ ފަދަ ސަރުކާރު ހިއްސާވާ ކުންފުނިތަކުން ކުރިއަށްގެންދާ މި މަޝްރޫއުތަކަކީ، ސަރުކާރު ހިއްސާވާ ކުންފުނިތައް ހަރުދަނާ އުސޫލުތަކެއްގެ ދަށުން ހިންގައި، ގައުމީ ތަރައްގީގެ މުހިންމު ބައިވެރިންނަށް ހެދުމަށް ވެވަޑައިގެންފައިވާ ވައުދު (ވައުދު ނަންބަރު 263) އާ އެއްގޮތަށް ކުރިއަށްދާ މަސައްކަތްތަކެކެވެ.