ސިނގިރޭޓް ޑިއުޓީ 4 ރުފިޔާއަށް ކުޑަކުރަން ޑަބްލިއުއެޗުއޯއިން ލަފާދީފި.

ދުނިޔޭގެ ސިއްހަތު ޖަމިއްޔާ (ޑަބްލިއުއެޗުއޯ) ގެ ލަފާގެ މަތިން، ސިނގިރޭޓުން ނަގާ އިމްޕޯޓް ޑިއުޓީ 4 ރުފިޔާއަށް ކުޑަކުރުމާ ގުޅޭގޮތުން ސަރުކާރުގެ ކަމާބެހޭ އިދާރާތަކުގެ މެދުގައި މަޝްވަރާތައް ފެށުމަށް ނިންމާފައިވާ ކަމަށް މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ އަލީ އިހުސާން ވިދާޅުވެއްޖެއެވެ. މި ބަދަލަކީ ދެމެހެއްޓެނިވި ގޮތެއްގައި ރާއްޖޭގެ އާންމު ސިއްހަތު ރައްކާތެރިކުރުމަށާއި، ދުންފަތް ކޮންޓްރޯލް ކުރުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން ދިރާސާތަކަށް ބިނާކޮށް ގެންނަން ވިސްނާ ބަދަލެކެވެ.

ދުނިޔޭގެ ދުންފަތުގެ އިސްތިއުމާލު ނުކުރާ ދުވަހާ ގުޅުވައިގެން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އަލީ އިހުސާން ވިދާޅުވީ، ރާއްޖޭގައި ވޭޕް މަނާކުރުމާ ގުޅިގެން ވޭޕް ބޭނުންކުރި މީހުން ކުއްލިއަކަށް ސިނގިރޭޓަށް ބަދަލުވުން ހުއްޓުވުމަށްޓަކައި 2024 ވަނަ އަހަރުގެ ނޮވެމްބަރު މަހު ސިނގިރޭޓުގެ ޑިއުޓީ ބޮޑުކުރި ކަމަށެވެ. އެގޮތުން އޭރު ސިނގިރޭޓަކުން ނަގާ ޑިއުޓީ 3.30 ރުފިޔާއިން 8.00 ރުފިޔާއަށް ބޮޑުކުރެވުނެވެ. މިއީ ވޭޕް ބޭނުންކުރާ މީހުން ސިނގިރޭޓަށް ބަދަލުވުން ހުއްޓުވުމަށްޓަކައި އެޅި ހަރުދަނާ، ނަމަވެސް ނިންމަން އުނދަގޫވި ފިޔަވަޅެއް ކަމަށް މިނިސްޓަރު ފާހަގަކުރެއްވިއެވެ.

މިނިސްޓަރު އިތުރަށް ވިދާޅުވީ، ދުންފަތުގެ އިމްޕޯޓް ޑިއުޓީއަށް ބަދަލު ގެނައުމަކީ ދުނިޔޭގެ ހުރިހާ ގައުމެއްގައިވެސް ދުންފަތް ކޮންޓްރޯލް ކުރުމަށް ގެންގުޅޭ މުހިންމު ސިޔާސަތެކެވެ. ނަމަވެސް، މިފަދަ ނިންމުންތައް ނިންމަންވާނީ އެއިރެއްގެ ހާލަތަށާއި ސައިންޓިފިކް ދިރާސާތަކަށް ބަލައިގެންނެވެ. ޑަބްލިއުއެޗުއޯއިން ހެދި ދިރާސާއަކަށް ފަހު، 2026 ވަނަ އަހަރަށް ރާއްޖެއަށް ރިކޮމެންޑް ކޮށްފައިވަނީ ސިނގިރޭޓަކުން ނަގާ ސްޕެސިފިކް ޑިއުޓީ ރޭޓު 4.00 ރުފިޔާގައި ބެހެއްޓުމަށެވެ. މިއީ ސަރުކާރުން މިހާރުވެސް ވަރަށް ސީރިއަސްކޮށް ވިސްނަމުންދާ ރޭޓެކެވެ.

އާންމު ސިއްހަތު ރައްކާތެރިކުރުމަށާއި ބަލިތަކުން ދިފާއުވުމަށް ސަރުކާރުން ގެންގުޅޭ މި ހަރުދަނާ ސިޔާސަތަކީ، ޕީއެންސީގެ މެނިފެސްޓޯގައި ހިމެނޭ މުހިންމު ވައުދަކާވެސް ގުޅިފައިވާ ކަމެކެވެ. އެގޮތުން، އާސަންދަ ގައުމީ ސިއްހީ ބީމާ ނިޒާމުގެ ދަށުން ކޮންމެ ދެ އަހަރަކުން އެއްފަހަރު ހިލޭ މެޑިކަލް ޗެކަޕް ހެދޭނެ އިންތިޒާމު ހަމަޖައްސައިދިނުމަށް ވެފައިވާ ވައުދު (ވައުދު ނަންބަރު 218) މީގެ ތެރޭގައި ހިމެނެއެވެ. މިފަދަ ފިޔަވަޅުތަކުގެ ސަބަބުން ދުންފަތުގެ އިސްތިއުމާލު ކުރުމުގެ ސަބަބުން ޖެހޭ ގައިންގަޔަށް ނާރާ ބަލިތައް ކުރިއާލާ ދެނެގަނެ، ދުޅަހެޔޮ މުޖުތަމައެއް ބިނާކުރުމަށް މަގުފަހިވެގެންދާނެއެވެ.

މިނިސްޓަރު އަލީ އިހުސާން ވިދާޅުވި ގޮތުގައި، ދުންފަތުގެ އިމްޕޯޓް ޑިއުޓީއަށް އެއްވެސް ބަދަލެއް ގެނައުމުގެ ކުރިން ކަމާބެހޭ ހުރިހާ އިދާރާތަކާއި ސްޓޭކްހޯލްޑަރުންނާއެކު ފުޅާދާއިރާއެއްގައި މަޝްވަރާ ކުރެވޭނެއެވެ. އަދި މި ބަދަލު ގެނައުމަށް ހުރިހާ ފަރާތްތަކަކުން އެއްބަސްވާނަމަ، ގާނޫނަށް ގެންނަންޖެހޭ އިސްލާހުތައް ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅާނެއެވެ.