ޕީއެންސީގެ ސެނެޓާ ގުޅޭގޮތުން ފެތުރި ޚަބަރުތައް ފަލާޙް ދޮގުކުރައްވައިފި.
މުހިންމު ކަންތައްތައް
- 1.ކުރިއަށް އޮތް ކޮންގްރެސް އިންތިޒާމުކުރުމާ ގުޅޭގޮތުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހުށަހެޅުއްވި ހުށަހެޅުއްވުމެއް ޕީއެންސީގެ ސެނެޓުން ބޭރުކޮށްލި ކަމަށް ބުނެ މީޑިއާތަކުން ފެތުރި ޚަބަރުތައް އިބްރާހީމް ފަލާޙް ދޮގުކުރެއްވިއެވެ.
- 2.ދޮގު ޚަބަރުތަކުގައި ބުނެފައިވަނީ ކޮންގްރެސްގެ ހުރިހާ ބާރެއް ލީޑާޝިޕަށް ދިނުމަށް ރައީސް ހުށަހެޅުއްވި ނަމަވެސް، ސެނެޓުން ނިންމީ އާންމު މެންބަރުންގެ ކޮމިޓީއަކަށް އެ ބާރު ދިނުމަށެވެ.
- 3.ފަލާޙް ހާމަކުރެއްވި ގޮތުގައި ސެނެޓް ބައްދަލުވުމުގައި ރައީސް ވަކި ކަމެއް ވަކި ގޮތަކަށް ކުރަން މަޖުބޫރު ކުރައްވާފައި ނުވާ ކަމަށާއި، ހުރިހާ ނިންމުމެއް ދޫކޮށްލެއްވީ ސެނެޓް މެންބަރުންގެ މަޝްވަރާއަށެވެ.
- 4.ޕާޓީގެ ލީޑާޝިޕާއި ސެނެޓުން ރައީސް މުޢިއްޒަށް ފުރިހަމަ އިތުބާރާއި ތާއީދު އޮތްކަން ހާމަކުރައްވައި، އެމަނިކުފާނު ބޭނުންފުޅުނުވާ އެއްވެސް ކަމެއް ޕާޓީގެ ތެރޭގައި ނުހިނގާނެ ކަމަށް ފަލާޙް ވިދާޅުވިއެވެ.
ވެރިކަންކުރާ ޕީޕަލްސް ނެޝެނަލް ކޮންގްރެސް (ޕީއެންސީ) ގެ ލީޑާޝިޕާއި ސެނެޓުގައިވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބޭނުންފުޅުނުވާ އެއްވެސް ކަމެއް ނުހިނގާނެ ކަމަށާއި، ޕާޓީގެ ހުރިހާ މެންބަރުންވެސް އެމަނިކުފާނު ދެކެ ނުހަނު ލޯބިވާ ކަމަށް އެ ޕާޓީގެ ޕާލަމެންޓްރީ ގްރޫޕުގެ ލީޑަރު އިބްރާހީމް ފަލާޙް ވިދާޅުވެއްޖެއެވެ. ފަލާޙް މިހެން ވިދާޅުވީ، ދާދި ފަހުން ބޭއްވި ޕީއެންސީގެ ސެނެޓް ބައްދަލުވުމެއްގައި ރައީސް މުޢިއްޒުގެ ހުށަހެޅުއްވުމަކާ ދެކޮޅަށް ސެނެޓުން ކަންކަން ނިންމާފައިވާ ކަމަށް ބުނެ ބައެއް މީޑިއާތަކުން ފަތުރާފައިވާ ޚަބަރުތައް ދޮގުކުރައްވައި އެކްސްގައި ކުރެއްވި ޕޯސްޓެއްގައެވެ.
ބައެއް ނޫސްތަކުން އިއްޔެ ރިޕޯޓް ކޮށްފައިވާ ގޮތުގައި، ކުރިއަށް އޮތް ޕީއެންސީގެ ކޮންގްރެސްގެ ކަންކަން އިންތިޒާމު ކުރުމުގައި ހުރިހާ ބާރެއް ޕާޓީގެ ލީޑާޝިޕަށް ދިނުމަށް ރައީސް މުޢިއްޒު ހުށަހެޅުއްވިއެވެ. ނަމަވެސް، ސެނެޓުން އެ ހުށަހެޅުއްވުމާ ދެކޮޅަށް ވޯޓުދީ، އާންމު މެންބަރުންގެ ތެރެއިން ބަޔަކު ހިމެނޭ ކޮމިޓީއަކުން އެ އިންތިޒާމުތައް ކުރިއަށް ގެންދަން ނިންމި ކަމަށް އެ ނޫސްތަކުން ވަނީ ރިޕޯޓް ކޮށްފައެވެ. މި ވާހަކަތަކަށް ރައްދު ދެއްވަމުން ފަލާޙް ވިދާޅުވީ، މިއީ ކަނޑައެޅިގެން ހަގީގަތާ ޚިލާފު ދޮގު ޚަބަރުތަކެއް ކަމަށާއި ޕާޓީގެ އެންމެންވެސް ރައީސް މުޢިއްޒަށް ފުރިހަމައަށް އިތުބާރުކުރާ ކަމަށެވެ.
އިބްރާހީމް ފަލާޙް އިތުރަށް ވިދާޅުވި ގޮތުގައި، ރައީސް މުޢިއްޒަށް އޮތް ތާއީދާއި އިތުބާރު ބޮޑު ނަމަވެސް، އެމަނިކުފާނު އަބަދުވެސް އިސްކުރައްވަނީ ޕާޓީގެ އަސާސީ ގަވާއިދާއި ހެދިފައިވާ އުސޫލުތަކުގެ އިތުރުން މަޝްވަރާކުރުމުގެ ރިވެތި ސިފައެވެ. އެގޮތުން، ނިމިގެންދިޔަ ޕީއެންސީގެ ސެނެޓް ބައްދަލުވުމުގައިވެސް ވަކި ކަމެއް ވަކި ގޮތަކަށް ކުރެއްވުމަށް ރައީސް ހުށަހަޅުއްވާފައި ނުވާ ކަމަށް އޭނާ ވިދާޅުވިއެވެ. "މުޅި ބައްދަލުވުމުގައިވެސް ހުރިހާ ކަމެއްވެސް ހުށަހެޅުއްވީ ސެނެޓް މެންބަރުންނަށް ފެނިވަޑައިގަންނަވާ ގޮތަކަށް ނިންމުމަށް،" ފަލާޙްގެ ޕޯސްޓުގައި ލިޔުއްވާފައިވެއެވެ.
މީގެ އިތުރުން، ބައެއް ނޫސްތަކަށް ފާޑުވިދާޅުވަމުން ފަލާޙް ވަނީ، ބައެއް ފަރާތްތަކުން ފައިސާ ދީގެން ނޫސްވެރިން ލައްވައި ބޮޑެތި ދޮގު ވާހަކަތައް ލިޔުވަމުންދާ ކަމަށް ތުހުމަތު ކުރައްވާފައެވެ. އަދި މިފަދަ ޚަބަރުތަކުން ސާފުވަނީ ދޮގު ޚަބަރު ފަތުރާ ފަރާތްތަކުން ޕާޓީގެ އެތެރޭގެ ބަދަހިކަން ނަގާލުމަށް ކުރާ މަސައްކަތްތައް ކަމަށް އޭނާ ވިދާޅުވިއެވެ. ރައީސް މުޢިއްޒުގެ ވެރިކަންކުރެއްވުމުގެ ވައްޓަފާޅިއަށް ތާރީފުކުރައްވަމުން ފަލާޙް ވިދާޅުވީ، އެމަނިކުފާނަކީ ރާއްޖޭގެ ފަހުގެ ތާރީޚެއްގައި ދެކުނު، މުޅި ގައުމުގެ ރައްޔިތުންގެ މަޝްވަރާއާއި ލަފާ ހޯއްދަވައިގެން ވެރިކަންކުރައްވާ ހަމައެކަނި ރައީސް ކަމަށެވެ. ޕީއެންސީގެ ހުރިހާ މެންބަރުންވެސް ތިބީ ރައީސްގެ ފަހަތްޕުޅުގައި ސާބިތުކަމާއެކު ކަމަށާއި، ޕާޓީގެ އެތެރޭގެ ބަދަހިކަމަށް ބުރޫއަރާނެ އެއްވެސް ޖާގައެއް ނޯންނާނެ ކަމުގެ ޔަގީންކަން ފަލާޙް ވަނީ ދެއްވާފައެވެ.